Question

What did you do during summer vacation?

Nate Hill Nate Hill (2) on 02/09/13

Even if you didn't do anything exciting, please tell us about your summer vacation in Esperanto!

What did you do? Where did you go? Who did you go with?

You can even lie and talk about what you wished you'd done!

Answers

1

Dum mia somera ferio ĉi-jare mi vizitis Tiszafüred kiu estas urbo en Hungario. La urbo estas konata ĉar ĝi situas apud la granda lago Tiso. Tamen la ĉefa logaĵo de tiu urbo por mi estis ke tie okazis la ĉi-jara IJS ­ aŭ plene nomate Internacia Junulara Semajno. Tio estas esperanta aranĝo por junuloj kiu okazas ĉiujare en diversaj urboj en Hungario. Tio estis mia unua IJS kaj mia unua vizito al Hungario.

Mi vojaĝis el Londono kun du amikoj. Survoje en Budapeŝto ni renkontis amason de esperantistoj kiuj estis vojaĝantaj kune al Tiszafüred. Multe el ili estis jam konataj al mi kaj tial la vojaĝo estis granda amuza amikaro.

Kiam ni finfine atingis la kongresejon, bonvenigis nin la organiza skipo kiu montris al ni la gastejon. Ĝi troviĝis nur kelkajn minutojn for de la lago piede. Estis granda ĉambro por la manĝoj, trinkejo kun spaco por diskejo kaj dometoj ĉirkaŭe kie ni povis dormi.

La vetero en Hungario estis varmega kaj pro tio ni ĉiutage naĝis en la lago por malvarmiĝi kaj amuziĝi. Eĉ dum la nokto la lago estis ankoraŭ varma do ankaŭ okazis kelkaj kaŝaj noktaj ekskursetoj al la lago.

Preskaŭ ĉiuvespere okazis diskejo en la trinkejo kun diversa muziko, inkluzive esperantan. DĴ Kunar, kiu estas iom fama inter esperantistoj, multfoje estris la diskejon kaj kreis tre bonan etoson. Ankaŭ estis tre ŝatata koncerto de la fama muzikisto Inicialoj D.C. kiu faras elektronikan rokmuzikon.

Dum la tago okazis bunta programo kun diversaj prelegoj, kursoj pri esperanto kaj multaj amuzaĵoj. Ni faris du ekskursojn. Unue ni vizitis apudan urbon (kies nomon mi forgesas) kun hungara gvidanto tradukata de unu el la organizantoj. Tiu gvido poste dividiĝis en du grupojn, unu vizitis grandan varmfontan banejon kaj la alia faris vingustumadon. Ŝajne la vingustumado etendiĝis pli ol oni atendis kaj ial la revena buso al la kongresejo estis multe pli laŭta kaj bonetosa ol la eliranta buso! La dua ekskurso por mi estis kanuumado. En tiuj boatetoj ni tri- aŭ kvar- ope remis tra parto de la lago. Tio estis bona ŝanco por aprezi kiom grandega estas la lago ĉar ĝi havas multajn partojn kun tre interesaj pejzaĝoj kiuj ŝajne al mi estas senfinaj.

Okazis tro multe dum la semajno por priskribi ĉion sed dankinde ne necesas ĉar vi povas simple reveni al la IJS venontjare kaj mem sperti la etoson! Ĝi estis unu el miaj plej ŝatataj ferioj ĉefe pro la tre interesaj kaj amikemaj homoj kaj bonhumora etoso. Mi jam antaŭĝojas la sekvan esperantan aranĝon.

Recordings

Comments

Your Answer

Share this question with your friends…